SBI శుభవార్త.. కస్టమర్లకు కొత్త సేవలు అందుబాటులోకి..!

దేశీ అతిపెద్ద బ్యాంక్ స్టేట్ బ్యాంక్ ఆఫ్ ఇండియా (ఎస్‌బీఐ) తాజాగా తన కస్టమర్ల కోసం కొత్త సర్వీసులు ఆవిష్కరించింది. ఎస్‌బీఐ కార్డ్ పే పేరుతో కొత్త ఫీచర్‌ను అందుబాటులోకి తీసుకువచ్చింది. పాయింట్ ఆఫ్ సేల్ (పీఓఎస్) మెషీన్ల వద్ద మొబైల్ ఫోన్ ద్వారానే కాంటాక్ట్‌లెస్ పేమెంట్ నిర్వహించొచ్చు.
ఎస్‌బీఐ కార్డు పే ద్వారా కేవలం ఒక్క ట్యాప్‌తో లావాదేవీ పూర్తి చేసేయవచ్చు. ఇక్కడ ఎలాంటి క్రెడిట్ కార్డు అవసరం ఉండదు. అలాగే పిన్ కూడా ఎంటర్ చేయాల్సిన పరిస్థితి ఉండదు. హోస్ట్ కార్డ్ ఎమ్యులేషన్ (హెచ్‌సీఈ) టెక్నాలజీ ఆధారంగా ఎస్‌బీఐ కార్డు పే పనిచేస్తుంది. దీంతో చెల్లింపులు వేగంగా, సులభంగా నిర్వహించొచ్చు. లావాదేవీలకు భద్రతకు ఎలాంటి ఢోకా ఉండదు.
అయితే ఈ సదుపాయం కేవలం ఎస్‌బీఐ క్రెడిట్ కార్డు ఉపయోగిస్తున్న వారికే అందుబాటులో ఉంది. ఎస్‌బీఐ కార్డ్ మొబైల్ యాప్‌లో ఈ ఫీచర్‌ను ఉపయోగించొచ్చు. దీంతో మీ కార్డును స్వైప్ చేయాల్సిన అసవరం ఉండదు. పిన్ చెప్పాలని పని లేదు.
హెచ్‌సీఈ ఫీచర్‌ ఉన్న యాప్స్ ద్వారా ఒకేసారి రూ.2,000 వరకు లావాదేవీ నిర్వహించొచ్చు. రోజుకు రూ.10,000 వరకు లిమిట్ ఉంటుంది. అయితే ఎస్‌బీఐ కార్డు పే ద్వారా రోజుకు, ఒక లావాదేవీకి కూడా పరిమితి విధించుకోవచ్చు.
ఎస్‌బీఐ కార్డ్ పే ఫీచర్‌ను ఉపయోగించాలని భావిస్తే వారి కార్డును ఈ సేవల కోసం రిజిస్ట్రేషన్ చేసుకోవాలి. ఎస్‌బీఐ కార్డు మొబైల్ యాప్‌లో ఈ ప్రక్రియను పూర్తి చేయవచ్చు. దీంతో కార్డు లేకుండానే స్మార్ట్‌ఫోన్‌తో చెల్లింపులు చేసేయవచ్చు. పీఓఎస్ మెషీన్ల వద్దకు ఫోన్ తీసుకువస్తే ఆటోమేటిక్‌గానే ట్రాన్సాక్షన్ పూర్తవుతుంది.