Agrigold | 'అగ్రిగోల్డ్' బాధితులకు శుభవార్త

అగ్రిగోల్డ్‌లో మదుపు పెట్టిన రూ.20 వేల లోపు డిపాజిట్లను చెల్లించేలా ఆంధ్రప్రదేశ్ రాష్ట్ర ప్రభుత్వం ఉత్తర్వులు జారీ చేసింది. అగ్రిగోల్డ్‌ బాధితుల కోసం ఇప్పటికే రూ.1,150 కోట్లు కేటాయించిన విషయం తెలిసిందే. ముందుగా రూ.263.99 కోట్లు విడుదల చేస్తూ అక్టోబర్‌ 18న ఏపీ సర్కార్ ఉత్తర్వులిచ్చింది. తొలి దశలో రూ.10 వేల లోపు డిపాజిట్లు చెల్లించాలని భావించింది.

అయితే.. అగ్రిగోల్డ్‌ ఆస్తుల వేలంలో జాప్యం జరుగుతున్నందున రూ.20 వేల లోపు డిపాజిట్లు చెల్లించి, వీలైనంత ఎక్కువ మంది బాధితులను ఆదుకోవాలని నిర్ణయించింది. ఇందుకు అవసరమైన చర్యలు తీసుకోవాలంటూ డీజీపీ, సీఐడీ అధికారులను ఆదేశిస్తూ తాజాగా ఉత్తర్వులిచ్చింది.
అధికారంలోకి రాగానే అగ్రిగోల్డ్‌ బాధితులను ఆదుకుంటామని పాదయాత్రలో వైఎస్ జగన్మోహన్‌రెడ్డి హామీ ఇచ్చిన విషయం తెలిసిందే. ముఖ్యమంత్రిగా ప్రమాణ స్వీకారం చేసిన తర్వాత బాధితులను ఆదుకునేలా మంత్రివర్గ సమావేశంలో తీర్మానం చేసి, బాధితులకు చెల్లించేందుకు రూ.1,150 కోట్లు కేటాయించారు.

విజయవాడకు చెందిన అవ్వా వెంకటరామారావు, మరికొందరు కలిసి 1995లో 'అగ్రిగోల్డ్‌ గ్రూప్‌ ఆఫ్‌ కంపెనీస్‌' స్థాపించారు. ఆంధ్రప్రదేశ్‌తో పాటు మరో ఏడు రాష్ట్రాల్లో ప్రజల నుంచి భారీగా డిపాజిట్లు సేకరించారు. అధిక వడ్డీలు ఇస్తామంటూ ఆశ చూపించి సుమారు 32 లక్షల మంది నుంచి రూ.6,380 కోట్లు వసూలు చేశారు. వారికి భూములు ఇవ్వకపోగా.. చేసిన డిపాజిట్లు కూడా తిరిగి ఇవ్వలేదు. దీంతో బాధితులు పోలీస్‌ స్టేషన్లలో ఫిర్యాదు చేశారు. అగ్రిగోల్డ్‌ సంస్థకు చెందిన భూములను విక్రయించి, తమకు డబ్బులు చెల్లించాలని గత టీడీపీ ప్రభుత్వానికి బాధితులు మొరపెట్టుకున్నారు.